Norborg – Sula 1-1 (1-1)
6. divisjon, Uggedal KGB, 23.04.2025
1-0 Peder Uggedal Søvik (35)
1-1 Mathias Bjørkavåg (42)
Sjansar: 7-7
Norborg og Sula spelte 1-1 i 6. divisjon si serieopning på Uggedal KGB. Trass motvind starta Norborg kampen best, men med mange forspelte sjansar måtte ein vente over ein halvtime før midtstoppar Peder Uggedal Søvik styrte inn leiarmålet. Diverre dabba Norborg av etter målet og gjestane utlikna til 1-1 ved Mathias Bjørkavåg. Med skot i både tverrliggjar og stolpe burde Norborg ha leia til pause. Etter kvila endra kampen karakter og gjestane hadde dei fleste sjansane. – Totalt sett greit med uavgjort. Vi gjer gode første 30-35 minutt og spelar då tidvis fin og sjanseskapande fotball. Sula skaper mest etter pause, men vi har også i denne omgangen den største sjansen. Trur også vinden passa det fysisk sterke Sula-laget betre enn oss, så totalt sett ein grei kamp av oss, sa spelande trenar Niklas Rekdal etter kampen.
Norborg gjekk rett i strupa på gjestane og var nær leiing allereie i opningsminuttet då Niklas Rekdal rundlurer Sula sin back og fann Ådne Hellandsvik framfor mål, men diverre gjekk avslutninga over mål. Fem minutt seinare er vertane endå nærmare scoring, men ballen gjekk i tverra. Etter eit par forsøk av både Rekdal og Tarjei Urkedal frå god posisjon var det nok ein gong aluminiumet som stod i vegen. Denne gong på eit skot frå Nicholas Kvammen. Det var difor særs fortent då Peder Uggedal Søvik styrte inn 1-0 ti minutt før pause. Gjestane vakna etter målet og tre minutt før pause utlikna Mathias Bjørkavåg på eit skot frå 17 meter som keeper Ronald Olsen fekk nokre fingrar på, men måtte sjå ballen gå stolpe inn.
Etter pause var gjestane det førande laget og skapte brorparten av sjansane, men Norborg hadde også sitt og Markus Torgersen fekk ein stor sjanse frå fem meter utan å få den i nota. Han spelte også fram Tarjei Urkedal til ein brukbar sjanse, men frå skrått hald fekk keeper ei hand på veteranen si avslutning. Fem minutt før slutt var Jonas Karlsbakk åleine igjennom, men sette ballen utanfor mål. Dermed vart det med eitt mål til kvart lag i sol og vind på Uggedal kunstgras.
Neste oppgåve for Norborg er borte Vigra onsdag 30. april kl 1830.
Laget: Ronald Søvik Olsen – Anders Toven, Peder Uggedal Søvik, Ole Johan Urke, Markus Søvik Gunnarsson (Lars Mikalsen, 64) – Niklas Rekdal, Ådne Hellandsvik, Nicholas Kvammen, Kai Kitsadakon (Oliver Gamlem, 64) (Robin Endré Hånde, 90), Markus Torgersen (Kitsadakon, 85), Tarjei Urkedal.
Dommar: Bjarte Steinsbu (Brattvåg)
