Norborg/Brattvåg2 – Hødd2 1-4 (0-0)
4. divisjon, Uggedal KGB, 17.09.2021
0-1 Tobias Pettersen Hatløy (71)
0-2 Andreas Hofset Televik (78)
0-3 Vegard Håheim-Elveseter (84)
0-4 Tobias Pettersen Hatløy (86)
1-4 Eirik Koppen Vågnes (90)
Norborg/Brattvåg2 haldt lenge liv i kampen, men i dei siste tjue minutta sa Hødd2 takk for følgje og scora heile fire gongar før Eirik Vågnes gav heimelaget eit trøystemål då han vart frispelt av David Sissoko. – Vi møtte eit godt lag frå Ulsteinvik. Dei var særs aggressive i sitt presspel og let oss aldri få tid og rom til å bygge opp spelet. Vi er likevel bra med i starten av kvar omgang, men mot slutten av kampen går vi opp i liminga etter å ha blitt kverna møre av god motstand, sa trenar Kristian Søviknes.
Dette var Norborg/Brattvåg2 sitt femte strake tap, men ein har framleis eit godt håp om å redde plassen med fem kampar igjen å spele. To av kampane går heime mot tøff motstand (Bergsøy og Rollon), medan dei tre bortekampane er mot botnkollegaer. På fredag står bortekamp mot Hareid for tur. Dette er den første av tre “cupfinalar” ein bør vinne, og i alle fall unngå å tape. Valder og Emblem er dei to andre bortekampane. Truleg må ein ha sju poeng på desse kampane for å ha rett til å spele i 4. divisjon.
Laget: Sander Arntsen – Per Kristian Helle Hildre, Tor Abelseth, Ulrik Havnsund, Jesper Vos (Magnus Otterlei, 89) – Eirik Vågnes, Ådne Hellandsvik, Thomas Aarsund (Anders Toven, 76), Igor Leonovs – David Sissoko, Martin Fylling Koch (Per Kristian Søvik, 72).
