Blindheim – Norborg 0-4 (0-2)
Blindheim KGB, 02.05.13
Sjansar: 5-8
Hjørnespark: 5-6
0-1 Kristoffer Søviknes (2)
0-2 Kristoffer Søviknes (15)
0-3 Cato Longva (60)
0-4 Kristoffer Søviknes (70)
Norborg vann i kveld komfortabelt over Blindheim, men dette var ingen typisk 4-0 kamp. Begge lag var i store delar av kampen solide defensivt, men Blindheim sov i forsvar to gongar det første kvarteret og Norborg sin målkonge takka for det med to mål før kvarteret var spelt. Ingen av laga greidde å få eit spelemessig overtak, men Norborg viste tidvis at ein har meir kvalitet i laget og auka yttarlegare to gongar etter pause. Fortent siger på ein ikkje altfor god dag.
Norborg har, etter det vi kan huske, aldri vunne ein bortekamp over Blindheim. I kveld ville gutane skrive historie og gjekk i strupa på heimelaget frå start av. Og for ein start det skulle bli. Litt over minuttet var spelt då Norborg fekk frispark midt inne på Blindheim sin halvdel. Kristian Søviknes slo ballen inn mot straffemerket der Kristoffer Søviknes stod heilt åleine og sette ballen sikkert i mål.
Norborg var hakket kvassare dei neste minutta, men greidde ikkje å kome seg til sjansar. Det gjorde Blindheim og Botolf Stolt-Nielsen 13 minutt ut i kampen, men utruleg nok sette han ballen utanfor stolpen etter at Norborg ikkje fekk klarert eit innlegg i frå høgre. I staden for 1-1 blir det 0-2 då Kristoffer Søviknes utnyttar ei forsvarstabbe hos Blindheim og får ballen i bakrom frå Daniel Aakre. Kristoffer runda keeper og sette ballen i tomt mål. 2-0 til Norborg før kvarteret spelt.
Den siste halvtimen var spelemessig jamn med mange duellar og konsentrert forsvarsspel. Begge lag kom seg likevel til eit par sjansar på dødball, men utan resultat.
Blindheim starta 2. omgang best og kom seg til eit par sjansar, men effektiviteten hos heimelaget var svak. I staden for redusering aukar Norborg til 3-0 på eit fint angrep der Kristoffer Søviknes kom seg inn i 16 meteren og spelte til ein betre plassert Cato Longva som sette ballen sikkert i mål. Kampen var punktert og Norborg slo seg litt meir laus offensivt og rulla opp nokre fine angrep. Tjue minutt før slutt sette Kristoffer Søviknes inn 4-0 då han puttar ein retur etter stolpetreff av Tarjei Urkedal. Ein stor del av æra for målet må delast med Daniel Aakre og Cato Longva som gjorde eit flott forarbeid.
4-0 var kanskje i overkant etter spel og sjansar. Kampen var jamnare enn som så, men ein fullt fortent siger til Norborg. Kristoffer Søviknes var effektiviteten sjølv. – Sinnsjukt deilig med tre poeng og å halde nullen. Det er første gong i år og smakar faktisk betre enn dei tre måla mine, sa Kristoffer etter kampen. Vi gir Kristoffer bestemannsprisen i dag. Vi trekker også fram Daniel Aakre som gjer nok ein god kamp på høgreback. Defensiv trygg krydra med offensive bidrag.
– Vi er nok ein gong konsentrerte defensivt og jobbar hardt. Vi har meir å gå på i det offensive spelet, men skaper likevel brukbart med sjansar og scorer heile fire mål på bortebane. Ein bra gjennomført kamp av gutane, sa trenar Oddmund Davik Otterlei.
Neste kamp for Norborg er heime mot Valder onsdag 8. mai kl. 1830.
Laget: Joakim Kjærstad (Ronald Søvik Olsen, 86) – Kristian Søviknes, Elling Mikal Kalvø, Erlend Coates, Daniel Aakre – Tarjei Urkedal (Ole-Kristian Aarseth, 86), Even Vestavik (Christian Sæther, 65), Preben Lorgen (Stian Myklebust, 82), Adrian Håbet (Knut Øyvind Grytten, 75) – Cato Longva (Alexander Eide, 75), Kristoffer Søviknes (Eirik Tomren, 86).
Kamphendingar:
2 min: 0-1. Kristoffer putter etter frisparkoppspel frå Kristian.
13 min: Stolt-Nilsen med stor sjanse, men treff ikkje mål.
15 min: 0-2. Kristoffer forfølger eit oppspel frå Daniel. Ein forsvarar tabbar seg ut og Kriss scorer åleine med keeper.
17 min: Blindheim-kontring. Greier ikkje å pare beina når han skal sette ballen i mål.
30 min: Farleg corner av Kristian. Avslutning like utanfor stolpen.
36 min: Farleg corner av Adrian. Cato headar over frå kloss hald.
38 min: Joakim med glimrande redning etter corner.
47 min: Valsson skyt utanfor frå god posisjon.
59 min: Farleg corner av Blindheim. Heading over.
60 min: 0-3. Cato putter etter pasning av Kristoffer.
68 min: Bee med stikker i bakrom til Kristoffer. Avslutning redda til corner.
70 min: 0-4. Kristoffer putter etter at Tarjei sette ballen i stolpen.
78 min: Knut Øyvind skyt men redda til corner.
80 min: Gult kort til Kristoffer. Han skyt i det fløyta går for offside. Uforståeleg gult kort.
