Norborg – Herd 1-9 (1-6)
Uggedal stadion, 09.09.10
Sjansar: 5-19
0-1 Thomas Pedersen (6), 0-2 Thomas Pedersen (18), 0-3 Jonas Larsen (19), 0-4 Andreas Ulvestad (20), 0-5 Pål Erik Ulvestad (33), 0-6 Thomas Pedersen (34), 1-6 Skjalg Volstad (37), 1-7 Vegard Bruland (48), 1-8 Andreas Ulvestad (69), 1-9 Sjølmål (85).
Sola skinte, gradstokken viste 23 og bana var grøn og fin. Der stoppa det positive for Norborg. Herd var minst ein divisjon betre og grisebanka stakkarslege Norborg. Det var spesielt før pause Herd fekk leike seg og måla kom i ein periode som perler på ei snor. Etter pause fekk Norborg gjort nokre rokeringar og justert pressleddet. Ein unngjekk dermed to-siffra, men likevel ei flau forestilling av Norborg.
Norborg fekk tilbake ein del spelarar frå sist kamp, og hadde eit håp om poeng mot tetlaget Herd. Ein hadde trass alt berre tapt 1-0 for dei på Color Line Stadion. Håpet om poeng skulle raskt forsvinne. Dei første 35 minutta er det svakaste Norborg har levert på mange år. Herd gjorde akkurat kva dei ville mot lite konsentrerte og sløve Norborg-spelarar.
Thomas Pedersen var den som skapte mest hovudbry for Norborg frå sin høgrekant. Tre gongar fekk han sette ballen i nota i løpet av dei første 34 minutta. Jonas Larsen, Andreas Ulvestad og Pål Erik Ulvestad fekk også lov til å score mål i løpet av den tida. Stillinga var 0-6, spenninga over og norborgarane starta å snakke om klubbens rekordtap, 0-12 for Ellingsøy i 1997.
Heldigvis løfta Norborg seg eit par hakk og fekk også eit flott mål på langskot av Skjalg Volstad. Herd slakka litt av på tempoet og vart også litt meir upresis i avslutningane. Dermed stoppa det på 1-9. Norborg sitt største tap sidan 13. juni 2000 då ein tapte 11-0 for Skarbøvik sitt 2. lag.
Laget: Trond Elstad – Kristian Søviknes (Ole Johan Urke, 46), Roger Grytten, Eliing Mikal Kalvø, Knut Ivar Bjørllykhaug – Bee, Skjalg Volstad (Hans Edvard Nordang, 46), André Larsen, Kristoffer Søviknes (Martin Løken, 79) – Tarjei Urkedal, Alexander Eide (Johan Stavik, 65).
Dommar: Rolf Jarle Eldevik (Ellingsøy)
Assistentar: Dag Harald Moldskred (Hareid) og Arild Vegsund (Norborg)
