Norborg – Rollon 3-0 (0-0)
Ravn KGB, 12.09.09
7 sjansar 9
2 cornere 7
8 avslutningar på mål 9
6 avslutningar utanfor 6
1-0 Tarjei Urkedal (55)
2-0 Adrian Håbet (69)
3-0 Ole Johan Urke (77)
Tilskodarar: 50
Dommar: Jan Lund (Blindheim)
Assistentar: Rolf Eldevik (Ellingsøy) og Øyvind Kringstad (Valder)
Laget: Espen Wold – Roger Grytten, Kjell-Terje Brusdal, Morten Kalvø, Stein Erik Reitan – Alexander Eide (Ole Johan Urke, 43), Skjalg Volstad (André Larsen, 88), Steffen Grytten, Adrian Håbet – Kristoffer Søviknes (Bee, 90), Tarjei Urkedal.
Norborg tok tre viktige poeng då Rollon vart slått på Ravn si kunstgrasbane laurdag ettermiddag. Etter ein mållaus og keisam 1. omgang, opna kampen seg opp etter kvila. Norborg var best innafor kvar 16 meter og kunne juble for ein etterlengta siger.
Norborg vart tvungen til å låne Ravn si kunstgrasbane då delar av grasmatta på Uggedal stadion låg under vatn laurdag morgon. Rollon har gjort ein god sesong så langt og ligg på 4. plass. Norborg hadde likevel god tru på siger sjølv om kampen gjekk på “nøytral” bane.
Norborg nærmast
Rollon fekk starte med vinden i ryggen, men greidde ikkje å få noko trykk på Norborg. Dei vel 50 tilskodarane som trassa regn og vind var vitne til ein keisam og lite velspelt omgang. Nærmast mål kom Norborg då Tarjei Urkedal heada eit innlegg frå Stein Erik Reitan i tverrliggjaren. Tarjei fekk også ein stor sjanse til, men sleiva Adrian Håbet sitt innlegg utanfor.
Rollon hadde stor avstand mellom angrep og midtbane og greidde dermed ikkje å skape noko meir enn nokre halvsjansar i denne omgangen. Norborg sitt spel var prega av mange feilval og ein fekk ikkje spelet til å gli.
Tarjei utnyttar feil
I motvind tok Rollon eit lite initiativ i starten av 2. omgang, men ti minutt ut i omgangen snappar Tarjei Urkedal opp eit laust tilbakespel av Thorkild Nelvik, rundar keeper og sette ballen sikkert i mål. Rollon gav seg ikkje, og eit par minutt seinare er ein utruleg nær mål på ein dobbeltsjanse. Men, først reddar Morten Kalvø på streken før Suran Jared feia ballen over frå kloss hald.
Håbet stiger
I staden for utlikning er det Norborg som går opp i 2-0 då Tarjei Urkedal spelar ein fin stikker til Adrian Håbet. Bergensstudenten gjer ingen feil og avsluttar med eit presist skot inne ved stolpen. Adrian spelte for øvreg sin kamp nr. 100 for Norborg. Rollon skapte fleire gode sjansar dei neste minutta, men enten stod keeper Espen Wold i vegen, eller så gjekk avslutningane utanfor.
Frisparkperle av Urke
Eit kvarter før slutt får Norborg frispark på knappe 20 meter. Ole Johan Urke dunkar slike frispark i mål gong på gong på trening. Denne gong lykkast han også i kamp, og ballen fauk i mål heilt oppe ved vinkelen. Vakkert! 3-0, og kampen er i realiteten punktert.
Kampen var langt jamnare enn resultatet tilseie. Rollon skapte minst like mykje som Norborg, men var denne gong ikkje dyktige nok framfor mål. Sjølv om Norborg kan glede seg over tre poeng er det mykje i spelet som ikkje stemmer. Ein gjer mange merkelege val og enkle pasningsfeil. Innsatsen er det derimot ikkje mykje å utsette på. Ei heller effektiviteten.
Ujamne prestasjonar på Norborg i denne kampen. Keeper Espen Wold var ikkje feilfri, men gjer mange gode redningar og er solid i feltet på Rollon sine mange hjørnespark. Steffen Grytten jobbar hardt og vinn mange duellar på midtbana, medan Adrian Håbet gjer mykje bra med ballen når han først blir involvert. Tarjei Urkedal og Kristoffer Søviknes gjer som alltid ein upåklageleg innsats på topp.
Norborg skal komande fredag ut i bortekamp mot Valder.
