Sunnylven – Norborg 3-2 (1-1)
Hellesylt stadion, 20.09.08
7 sjansar 5
5 cornere 5
0-1 Tarjei Urkedal (15)
1-1 Alf Ole Sundgot (25)
2-1 Bård Forbord (str. 62)
3-1 Olav Åge Åsen (71)
3-2 Tarjei Urkedal (str. 76)
Dommar: Øystein Ytterland (Valder)
Ass. dommarar: Oddbjørn Aam (Åmdal) og Svein-Ole Sørensen (VRF)
Laget: Geir Roar Gamlem – Steffen Grytten , Elling Mikal Kalvø, Roger Grytten, Kristian Furnes (Kjell-Terje Brusdal, 65) – Ole Johan Urke, Kristian Søviknes (Stein Erik Reitan, 65), Asgeir Kalvø, Skjalg Volstad (Johan Stavik, 65) – Tarjei Urkedal, Kristoffer Søviknes.
Norborg greidde heller ikkje denne gongen å kvitte seg med Sunnylvs-spøkelset. Det såg likevel lyst ut då Tarjei Urkedal sendte oransjetrøyene i føringa, men så mista ein hovudet og Sunnylven snudde kampen.
– Vi jobba godt, men diverre tapte vi kampen på grunn av for lite klokskap, sa trenar Ivar Roald etter kampen.
God start
Norborg starta kampen brukbart og greidde å spele fotball langs bakken dei første tjue minutta. Sunnylven hadde då problem med å halde følgje og måtte gi vekk nokre hjørnespark før Tarjei Urkedal tuppa ballen i mål på den første store sjansen etter godt forarbeid av Kristoffer Søviknes.
Utnyttar feil
Norborg hadde i denne perioden full kontroll defensivt på heimelaget sitt einaste angrepsvåpen Alf Ole Sundgot, men 25 minutt ut i kampen glepp det. Sundgot er omringa av tre Norborg-forsvararar på kanten av 16 meteren då han ser at keeper Geir Roar Gamlem er på halvdistanse. Sundgot fornektar seg ikkje og lobbar presist i lengste hjørne til 1-1.
Keisamt
Utlikninga gjer Norborg tydeleg frustrert og lite stemmer. Ballen vert i alt for stor grad pumpa opp mot spissar som er sjanselaus i lufta mot kompromisslause stopparar. Heimelaget skaper også lite i ein keisam og lite underhaldande omgang.
Heimelaget tek føringa
2. omgang var særs svak av oransjetrøyene. Den starta likevel oppløftande med to store sjansar til Tarjei Urkedal og Kristoffer Søviknes. Etter dette var heimelaget best. Berre ei fantastisk redning av Geir Roar Gamlem hindra Reidar Støverstein i å score etter corner. Nokre minutt seinare må likevel keeper Gamlem hente ballen ut av nettet då Bård Forbord sette ei straffe sikkert i mål. Mange hevdar at det ikkje var straffe då Sundgot gjekk ned i feltet i duell med Roger Grytten. Likevel, unødvendig av Norborg som burde ha klarert situasjonen lenge før.
Sunnylven er gode på dødball, og i midten av omgangen headar Olav Åge Åsen inn 3-1. Kampen verkar over for Norborg sin del, spesielt då Steffen Grytten får sitt andre gule og må forlate banen. Tarjei Urkedal tenner likevel eit lite håp då han blir felt av keeper innanfor straffefeltet og sette sjølv ballen i mål frå kritmerket.
Norborg prøver å legge eit press på Sunnylven det siste kvarteret, men spelet er upresist og heimelaget er nærmare eit fjerde mål på sine kontringar enn Norborg er utlikning.
Skuffande kamp av Norborg der ein nok ein gong går i Sunnylven si felle og slår mange lange ballar. Det vart også særs mange personlege feil utover kampen med stadig meir frustrerte spelarar. Bestemannsprisen på Norborg gir vi Tarjei Urkedal. Han scora to mål og jobba godt, men hadde vanskelege arbeidsforhold. Banens beste var Sunnylven sin midtbanegeneral Bård Forbord.
Norborg er framleis på opprykksplass før møtet med Ørsta på Uggedal stadion laurdag kl. 15.
På notisblokka:
14 min: Farleg Norborg-corner. Sunnylven får blokkert forsøka.
15 min: 0-1. Tarjei Urkedal tuppar inn frå kloss hald etter forarbeid av Kristoffer.
22 min: Ole Johan headar ein corner i nettveggen.
25 min: 1-1. Alf Ole Sundgot utliknar med ei presis avslutning frå kanten av 16.
43 min: Sunnylven på farleg visitt, men avslutninga går utafor.
48 min: Tarjei med stor sjanse. Header midt i klypene til keeper.
49 min: Kristoffer finter seg inn i 16 meteren, men avslutter utanfor frå 12 meter.
56 min: Reidar Støverstein med stor sjanse. Fantastisk redning av Geir Roar.
61 min: Sundgot skaffer seg straffespark i duell med Roger.
62 min: 2-1. Bård Forbord sette straffa sikkert i nota.
71 min: 3-1. Olav Åge Åsen aukar då han headar inn ein corner.
73 min: Steffen får sitt andre gule.
75 min: Sundgot headar i bakken og over.
76 min: 3-2. Keeper feller Tarjei. Tarjei setter sjølv inn straffa.
92 min: Helge Tryggestad kontrar, men skyt utafor frå 16 meter.
