Norborg – HaNo 4-1 (2-0)
Uggedal stadion, 24.08.06
10 sjansar 7
4 cornere 4
1-0 Steffen Grytten (23)
2-0 Tarjei Gjerset Urkedal (42)
3-0 Steffen Grytten (52)
4-0 Eirik Urkedal York (85)
4-1 Kenneth Ulla (90)
Tilskodarar: 202
Dommar: Jan Lund (Blindheim)
Ass. dommarar: Norvald Helge Lausund (Lepsøy) og Magne J. Krumsvik (Volda)
Laget: Trond Elstad – Kristoffer Søviknes (Stein Erik Alvestad, 87), Roger Grytten (Jan Even Drønnesund, 88), Steffen Grytten, Stein Erik Reitan – Asgeir Kalvø, Eirik York (Bee, 90), Kristian Søviknes, Tarjei Urkedal (Vebjørn Grytten, 87) – Kim Idar Krogsethagen (Ståle Hurlen, 86), Ståle Hurlen (Lennart Holmem, 46)
HaNo fekk eit lite tilbakeslag i sine opprykksplanar då det vart 4-1 tap for Norborg torsdag kveld. I ein spelemessig jamn kamp viste oransjetrøyene seg som det beste laget innafor kvar 16 meter og vann fortent.
– Det kunne fort gått annleis, sa Norborg-trenar Jan Egil Alstadsæter etter kampen. Nok ein gong tek det lang tid før vi vaknar, og vi kunne fort fått eit mål imot tidleg i kampen. Men vi greier etterkvart å jobbe oss inn i kampen, og spelar tidvis god fotball. Så fortent siger til gutane i dag.
– Spelemessig jamt, men Norborg er sterke på dødballar og avgjorde kampen på det. Vi hadde våre sjansar, men likevel fortent siger til Norborg, sa HaNo sin målscorar Kenneth Ulla.
God underhaldning
Det talrike publikummet i Uggedalen fekk sjå ein underhaldande kamp mellom to gode 4. divisjonslag. Tilskodarane hadde knapt rukket å sett seg før begge lag hadde kome seg til kvar sin sjanse. HaNo var først frampå då Stian André Haram vart spelt fri, men keeper Trond Elstad kom fint ut og blokkerte forsøket. Nokre minutt etter var det visse kommunikasjonsvanskar mellom den nye HaNo-keeperen Ole Morten Farstad og forsvaret. Etter ei svak klarering hamna ballen hos Kim Idar Krogsethagen som avslutta like utafor det opne HaNo-buret.
Forskjellen var dødballar
Ved halvvegs omgang er gjestane svært nær å ta leiinga, men HaNo sin beste spelar for kvelden, Lars Petter Haram, måtte sjå skotet sitt frå 14 meter gå i stolpen og ut. I staden for 0-1 er det Norborg som lagar 1-0 minuttet etter då Steffen Grytten headar inn eit godt slått frispark frå Kristian Søviknes.
Etter målet blir det mykje nesten for begge laga. Begge forsvara er solide og snappar opp forsøka som kjem, men fem minutt før pause er Stian A. Haram frampå med eit skummelt forsøk frå nær død vinkel. Ballen trillar på strek før Steffen Grytten får klarert. Norborg har marginane på si side, og i staden for utlikning aukar vertane leiinga til 2-0 då Tarjei Urkedal sette inn ein retur frå keeper Farstad etter ei heading frå Steffen Grytten. Nok ein gong er det Kristian Søviknes som har slått eit hardt og presist frispark inn framfor mål.
Norborg viste seg som det kvassaste laget innafor kvar 16 meter, og fekk fortent applaus frå publikum når ein gjekk til pause.
Norborg-dominans
Etter kvila er det Norborg som kjem best i gong, og Asgeir Kalvø er ute å testar skotfoten tidleg i omgangen, men Farstad reddar godt. 3-0 skal likevel ikkje vente lenge på seg, og endå ein gong er midtstoppar Steffen Grytten involvert. Denne gong stig han til vers ved bakarste stolpe å heada inn eit innlegg frå Tarjei Urkedal.
Norborg får no roa, og spelar god og sjanseskapande fotball det neste kvarteret, men 4-0 let vente på seg, og etterkvart er det HaNo som startar å ta over kampen. Utan at keeper Elstad blir satt på nokon vanskelege prøver. Fem minutt før slutt er Eirik York ute på eit langt løp. Han blir spelt igjennom av Kristian Søviknes, tek seg god tid og lobbar over keeper til 4-0.
Trøystemål
I sluttminutta blir Kenneth Ulla flytta fram på bana, og to minutt på overtid sette pynta han på resultatet då han scora sikkert aleine med keeper. – Han var ein halvmeter offside, innrømmer HaNo sin Hallgeir Remme. Det meinte også Norborg sitt forsvar som stod med arma i veret. Like fullt, 4-1.
Norborg har vunne tre kampar på rad og har lagt botnstriden bak seg for godt. Laget opptrer med ein langt større tryggleik bakover på bana, og det smittar også over på det offensive spelet. I denne kampen var spesielt den første halvtimen av 2. omgang god. Då dominerte Norborg og skapte fleire gode sjansar. Duellane vart vunne og tempo på ball var høgt.
Best hos heimelaget var Steffen Grytten. Med sin aggressive spelestil vann han duellane både i eigen og motstandars 16-meter. Dette resulterte blant anna i to scorede mål. Elles stod Trond Elstad godt bakarst, medan Tarjei Urkedal og Kristian Søviknes var gode på midtbana. Sistnemnte med fleire gode dødballar. Skryt også til ungguten Kristoffer Søviknes som på uvant venstrebackplass spelte seg stort opp og fekk god kontroll på HaNo sin farlege ving Stian A. Haram.
Neste kamp for Norborg er mot tabellnabo Godøy torsdag 31. august.
