Norborg – Blindheim/Emblem 3-5

Norborg måtte nok ein gong gjere rokkeringar i forsvar. Roger Grytten var på klassetur og med det vart det vald å sette inn eit nytt stopparpar i Christian Søvik og Geir Ove Grønli. Sidan Christian vart flytta frå back til stoppar fekk Jan Even Drønnesund sjansen frå start for første gong i år. Berre Steffen Grytten behaldt då plassen sin frå HaNo-kampen. Offensivt fekk Alexander Gamlem sjansen frå start etter gryande form på trening og 7’ar kamp.

Stor Norborg dominans i starten
Norborg opna i eit voldsamt tempo og pressa Blindheim/Emblem tilbake på bana. Etter to minutt kjem første sjansen. Kim Idar Krogsethagen og Tarjei Urkedal kombinerer fint og Tarjei kjem seg igjennom, men skotet hans frå 13 meter stryk seg utafor stanga. To minutt seinare skulle så ballen gå i mål. Alexander Gamlem vinn ein løpeball i duell med BE backen. Han spelar til Tarjei som kjem seg ned til kortlinja å legg inn til Kristian Søviknes som puttar frå kloss hald.

Annullert mål
Norborg fortsette å styre kampen og etter 12 minutt ligg ballen igjen i nota etter eit godt frispark frå Kim Idar. Problemet var at dommaren dømte indirekte, medan Kim Idar skaut direkte. Dermed annullert mål. Like etter får Kim Idar ein ny sjanse, men med fri veg mot mål avslutta han svakt rett på keeper frå 16 meter.

Ottersen utliknar
Etter eit kvarter startar Norborg å gjere enkle feil, og gjestane kjem gradvis inn i kampen. Ved ein halvtimes spel får dei svarte og kvite sin første sjanseved Terje Ottersen, men han greier ikkje å overliste Geir Roar Gamlem i Norborg-målet. Ti minutt seinare gjekk det så annleis. Norborg ser ut til å ha god kontroll på BE sitt angrep ute på høgresida, men høgrevingen får slått ballen inn til Ottersen som står umarkert på 18 meter. Han ladar skotfoten å sette ballen presist inne ved stolpen til 1-1.

Laga gjekk til pause med 1-1. Noko Norborg var minst nøgd med. Heimelaget produserte fleire store sjansar det første kvarteret og hadde fortent å leia ved pause.

Ottersen på ny
Blindheim/Emblem starta 2. omgangen best og berre ei glimrande redning av Geir Roar hindra mål då Lars Andreas Vegsund får avslutte frå 7 meter. Minuttet etter er Norborg i angrep og Kim Idar får ein bra sjanse å score, men avslutninga går over mål. 7 minutt ut i omgangen får gjestane hjørnespark. Ballen blir slått på næraste stolpe der det oppstår klabb og babb før Terje Ottersen kranglar ballen over streken til 2-1 leiing.

Norborg snur kampen
Norborg kjem seg raskt til hektene å spelar seg fram til ein corner. Kristian Søviknes slår på bakarste stolpe der Geir Ove Grønli puttar ballen i nota til 2-2. Norborg har eit lite initiativ i kampen, men greier ikkje å spele seg fram til dei store sjansane. Ikkje før i det 25. minutt blir det på nytt farleg då Norborg igjen får indirekte frispark like utafor 16 meteren. Denne gongen rullar Kristian ballen dei nødvendige centimeterane til Kim Idar som dundrar ballen i stolpen og ut. Fem minutt seinare tek Norborg så leiinga. Kristian Søviknes slår ein stikkar mot Øyvind Kvammen, men keeper er ute å snappar og ser ut til å ha kontroll. Men ballen glepp under han å ligg fri framføre Øyvind som enkelt puttar ballen i det tomme buret. Eit heldig mål, men likevel 3-2 og det går mot ny heimesiger.

Kommunikasjonsproblem
Men det er no eit slitent heimelag startar å miste hovudet. Sju minutt før ordinær tid er omme slår B/E eit tilsynelatande ufarleg innlegg. Geir Roar ropar høgt å tydeleg keeper, men Geir Ove vel å klarere framføre eigen keeper. Dette skulle vise seg å koste Norborg dyrt. Ballen kjem raskt tilbake og Henning Hareide får stå heilt aleine på 14 meter å skyte ballen i mål inne ved lengste stolpe.

Sluttkjørt
Norborg har no lite å stille opp med mot eit løpsvilleg bortelag. Minuttet før slutt får så gjestane frispark på 19 meter. Terje Ottersen gjer seg klar å dunkar ballen i tverrliggjar og inn. 4-3 til Blindheim/Emblem som igjen har snudd kampen til sin fordel. Like før full tid fullfører Kristoffer Morterud audmjukinga ved å lage 5-3 aleine med Geir Roar.

Spelar for vanskelegt
Etter ei svært god opning på kampen rekna dei fleste tilskodarane at dette kom til å bli ein enkel siger, men kor feil kan ein ta. Norborg gjorde gong på gong personlege feil og inviterte Blindheim/Emblem inn i kampen og slapp for tredje gong i år inn 5 mål. På heimebane har det ikkje har skjedd på 5 år. I staden for å gjere ting enkelt prøvar mange av spelarane seg på litt for mykje fiksfakseri, chippar og utsidepasningar. Spesielt prøvde ein altfor ofte å løfte ballen over motstandaren si forsvarsrekke, i staden for å slå ein enkel stikkar langs bakken mellom stoppar og back. Dei aller fleste gongane Norborg prøvde å slå over Blindheim/Emblem sine forsvarar vart dei klarert. Mens dei få gongane det vart slått langs bakken vart det farlege sjansar eller halvsjansar. Når ein har temposterke angriparar som Kim Idar og Alexander/Øyvind/Edward må dette nyttast betre med å spele langs bakken. Ikkje i lufta. Norborg har alt i alt svært mykje å gå på, men må snart over tid starte å vise kva laget er godt for. Ikkje berre i sporadiske kampar.

Svært vanskeleg å plukke ut Norborg-spelarar som utmerka seg i dag, men Geir Roar hadde eit par klasseredningar bak eit litt rufsete forsvar, medan Kristian gjorde ein brukbar kamp. Elles er det mange som jobbar godt, men som får lite ut av det.

Blindheim/Emblem hadde eit jamt godt lag, men hadde store problemer den tida Norborg kjørte tempo på ball i starten av kampen. Etter at Terje Ottersen vart flytta ned på midtbana fekk dei kampen inn i sitt spor og viste at dei blir eit lag å rekne med framover.

Dommar Tor Bjemeland var som heimelaget svært variabel i prestasjonane. På søndag er det klart for ny kamp.

Vi har lov til å vere litt gretne og forbanna i kveld og i morgon, men vi ristar av oss dette tapet også, og har humør og speleglede når vi dreg over fjorden for å banke Ellingsøy.