Tor Abelseth, til høgre i biletet, spelte 1973 av dei totale 1980 mogelege minutta i årets 4. divisjon, og var den på Norborg/Brattvåg2 som spelte mest. Eit motvilleg byte sju minutt før slutt i heimekampen mot Bergsøy i august gjorde at midtstopparen ikkje fekk æra av å spele samtlege minutt. Gard Sæterøy Rogne spelte nest mest med sine 1841 minutt, medan Kjell Terje Brusdal spelte tredje mest med 1558 minutt. Totalt var det 37 spelarar som fekk speletid. Her er den komplette lista.

Joakim Barstad vart den mest effektive spelaren med 1 mål på 62 minutt. Magnus Austbø Seth brukte 98 minutt per mål. Seth vart også toppscorar for Norborg/Brattvåg2 med 11 mål på 12 kampar. Han fortsette å score mål også i Trøndelag med 4 mål på 7 kampar for NTNUI i 4. divisjon.

Norborg/Brattvåg2 vann 2-1 borte over Hareid i siste seriekamp og enda dermed på den sikre 8. plassen i 4. divisjon. Norborg/BIL2 leverte ein solid kamp utan å glitre i kveld. Hareid gjekk aggressivt til verks og tok også leiinga 1-0 tidleg i kampen då Kim André Alvestad var frampå etter at keeper Neydson Da Silva glapp den sleipe ballen etter eit hardt frispark inn framfor mål. Da Silva ville ha frispark i situasjonen, men snakka for døve ører. Hareid ville mest og jobba knallhardt det første kvarteret, men gradvis tok gjestane over og halvvegs ut i omgangen heada Akseli Kalermo ein corner frå Simen Hagbø kontant i nota. Etter pause hadde Norborg/BIL2 kontroll defensivt og skapte nokre sjansar ved Alexander Jonassen og Tor Abelseth før Fredrik Hurlen steig til vers å heada inn eit legg frå Emil Solnørdal ti minutt før slutt. Norborg/BIL2 hadde full kontroll i sluttminutta og var nærmare eit tredje mål enn Hareid var utlikning. Vi gratulerer laget med ein solid kamp og ståplass i divisjonen.
Les meir..

Fredag kl. 1830 barker Hareid og Norborg/Brattvåg2 saman i den siste seriekampen for i år. – Det mest keisame som er i fotballen er å ligge midt på tabellen utan noko å spele for, sa Tom Nordlie for nokre år sidan. På Hareid blir det alt anna enn keisamt. Begge laga treng mest truleg poeng. Hareid helst tre, Norborg/BIL2 er sikra plass i neste års 4. divisjon med uavgjort.

Norborg har hatt eit godt tak på Hareid og har ikkje tapt sidan oktober 2013. I den kampen hadde Norborg spelet og dei fleste sjansane, men Hareid scora fem mot Norborg sine null. I etterkant vart Norborg i Sunnmørsposten skulda for å ikkje ville rykke opp i 3. divisjon (noko vi til slutt gjorde). Sist veke vart ein skulda for å faktisk ville gjere ein innsats for å stå i 4. divisjon då ein auka antallet av Brattvåg sine innbytarar i 2. divisjon frå 2 mot Volda til 7 mot Hødd2. At motstandaren auka frå 2 mot Larsnes/Gursken til 6 mot Norborg/BIL2 var ikkje så nøye for Sunnmørsposten. Truleg rekna dei Brattvåg sine innbytarar som langt betre enn Hødd sine, og det er jo positivt. Vi var i alle fall vitne til ein rettvis og god 4. divisjonskamp på Høddvoll.

Sidan tapet i 2013 har ein slått Hareid seks gongar og spelt ein uavgjort. Held denne rekka fram så er plassen sikra, men Hareid er i god form og blir ingen enkel motstandar. Dei har slått Blindheim 2-1 og Larsnes/Gursken 5-2 på sine to siste kampar. Det har tatt dei forbi Emblem og Ørsta på tabellen og til å ha alt i eigne hender. Dei scorar normalt ikkje mykje mål, men er godt organisert og slepp inn få. På eige gras så er det berre dei to topplaga som har sleppt inn færre. Den tidlegare Hødd-spelaren Ruben Kenneth Brandal er hjerna i laget og også toppscorar med 9 mål.

Troppen til Norborg/Brattvåg2 er ikkje klar endå, men av dei som var med mot Hødd2 sist så er Ole Johan Urke, Niklas Rekdal og Victor Pedersen uaktuell. Thomas Aarsund, Marius Fylling Rogne og Anders Toven er igjen aktuelle for spel.

Vi håper mange tek turen til Hareid denne fredagen for å støtte samarbeidslaget. Det er viktig at Haram har eit lag i 4. divisjon også neste år.

Dommar: Daniel Refsnes (Herd)
Assistentar: Henrik Pettersen Sunde (Baune) og Viktor Lillebø Rongve (SIF/Hessa)

Ei runde før slutt har Ronald Søvik Olsen tatt leiinga i vår tabellkonkurranse. Her er øvre halvdel.

SIF/Hessa vann i kveld 5-3 borte mot Emblem og er dermed sikra spel i neste års 4. divisjon. Emblem på si side må slå Ørsta for å vere sikra plass og unngå å bli Herd- og Volda-supportarar seinare i haust. Det starta veldig bra for Emblem som leia 2-0 når 13 minutt var spelt, men ti minutt seinare stod det 2-2. SIF/Hessa scora endå ein gong før pause og leia på det meste 2-5.

Norborg/Brattvåg2 vann den tøffe bortekampen mot Hødd2 med 2-0 måndag kveld. Etter ein mållaus 1. omgang der heimelaget var nærmast leiinga, vakna oransjetrøyene etter pause og avgjorde kampen med to mål dei siste tjue av Alexander Jonassen og Niklas Rekdal. Sigeren gjer at Norborg/BIL2 har alt i eigne hender før bortekampen mot Hareid 25. oktober.
Les meir..

Norborg/Brattvåg2 måtte i sin siste heimekamp for året sjå seg slått 0-6 av Volda. Gjestane var totalt overlegen på først og fremst to område. Rutine og størrelse. Det ga laget fire mål på fire dødballar den første halvtimen. Det var faktisk dei einaste sjansane dei fekk før pause. Norborg på si side skapte null og niks. Etter pause fekk Norborg nok eit slag i andletet då Volda scora på sitt første angrep. Kampen opna seg litt meir opp etter kvila og også Norborg kom seg til situasjonar framfor Volda sin keeper, men utan å lykkast. Dryge ti minutt før slutt fastsatte Bischoff sluttresultatet til 0-6 på eit skot til 20 i stil. Dermed fekk grøntrøyene sin revansje etter å ha tapt 1-4 heime for oransjetrøyene.
Les meir..

Norborg/Brattvåg2 tek imot topplaget Volda i det som er den siste heimekampen for vårt 4. divisjonslag. Norborg vann vårens møte i Volda med 4-1 og stilte også den gong utan spelarar frå Brattvåg sin A-stall.

Volda er, som tabellposisjonen vise, eit godt lag, men Norborg har trass mange tap spelt jamt med dei fleste i haust, og skal kunne gi Volda hard kamp om poenga. Vi håper mange møter i Uggedalen for å støtte laget i sin kamp for å overleve i divisjonen.

Det er fortsatt ikkje avklart kor mange lag som rykker ned frå 4. divisjon, men minst 1 lag må ned. For at berre eitt lag skal ned så må Herd halde seg i 3. divisjon og vinnaren av 4. divisjon Sunnmøre (Volda eller Bergsøy) må slå vinnaren på Nordmøre/Romsdal (Kristiansund BK 2). Rykker Herd ned og KBK2 rykker opp, rykker 3 lag ned. Skrekkscenarioet gjer at heile 6 lag på Sunnmøre er utrygge, saman med Blindheim, som allereie er klar for 5. divisjon om minst 2 lag rykker ned. Her er kampprogrammet for laga i faresonen.
Les meir →

Ørsta – Norborg/Brattvåg2 4-2 (3-2)
4. divisjon, 04.10.2019

1-0 Mads Øvrebotten (2)
1-1 Tor Abelseth (10)
2-1 Simen Flekke (22)
3-1 Simen Flekke (27)
3-2 Ruben Holmeset (45)
4-2 Sjølvmål (90)

Norborg måtte nok ein gong sjå seg slått i ein kamp ein hadde det meste av banespelet, men motstandaren var langt meir effektiv framfor mål. Norborg la seg lavt i bana frå start av, men planen om å satse på kontringar fekk seg eit skot for baugen då Mads Øvrebotten si heading fr å 16 meter gjekk i boge over alle og landa i mål då 2 minutt var spelt. Norborg kom tilbake og utlikna på straffe ved Tor Abelseth. Omtrent halvspelt i 1. omgang scorar heimelaget og Simen Flekke to mål på to sjansar. Det eine på eit vakkert skot i krysset frå kanten av 16 meteren. Norborg tek då totalt over banespelet, men sleit med å skape sjansar mot eit heimelag med alle mann i forsvar. Ruben Holmeset greier likevel å få ballen i nota like før pause og ga oransjetrøyene håp om poeng. I 2. omgang foregjekk spelet inne på Ørsta sin banehalvdel, men ein sleit med å finne opningar i heimeforsvaret. På tampen blir kampen punktert på eit sjølvmål. Neste kamp er heime mot Volda fredag kl. 19.