Åram/Van.kam. – Norborg 4-6 (1-2)
Eidsåvoll stadion, 16.06.07
7 sjansar 13
5 cornere 7
0-1 Tarjei Gjerset Urkedal (6)
1-1 Sigve Støylen (20)
1-2 Steffen Grytten (45)
2-2 Ole Theodor Hovden (48)
2-3 Kim Idar Krogsethagen (51)
2-4 Kim Idar Krogsethagen (70)
2-5 Tarjei Gjerset Urkedal (73)
2-6 Steffen Grytten (80)
3-6 Martin Eikremsæther (85)
4-6 Håvar Karlsen (90)
Dommar: Christer Jensen (AaFK)
Ass. dommar: Hans J. Finsæther (AaFK) og Karl-Fredrik Velle (Hødd)
Laget: Geir Roar Gamlem – Asgeir Kalvø, Kjell Terje Brusdal (Knut Ivar Bjørlykhaug, 53), Steffen Grytten, Stein Erik Reitan – Kristian Søviknes, Bee (Martin Grytten, 82), Kim Idar Krogsethagen – Edward Laverton (Tarjei Urkedal, 89), Tarjei Urkedal (Ole Johan Urke, 82), Kristoffer Søviknes
Norborg viste seg som det beste laget under praktfulle speleforhold på Eidsåvoll laurdag ettermiddag. Oransjetrøyene tok tak i kampen frå første minutt, og hadde ei komfortabel leiing då heimelaget fekk nokre gåvepakker på slutten og fekk pynte på resultatet.
Norborg leigde båt til Eidså denne gong, og tok med seg det gode humøret ein fekk på båtturen over til kamp. Det er lenge sidan vi har opplevd så god stemning i Norborg-garderoba før kamp.
Tidleg leiing
Ein pressa ÅVK høgt frå første spark, vann duellane og turte å spele langs bakken. Etter eit par halvsjansar får Tarjei Urkedal kampen sin første store sjanse etter innlegg frå høgresida. Kristoffer Søviknes vinn ballen like framfor mål og får gitt til Urkedal som scorar frå kloss hald.
Enkelt for Støylen
Ti minutt seinare er Urkedal nær sitt andre mål, men avslutninga går i stolpen. I staden er det Sigve Støylen som snappar ballen midt inne på Norborg sin banehalvdel, spring lett igjennom forsvaret å scorar sikkert aleine med keeper Geir Roar Gamlem.
Fortent leiing
Norborg er likevel det beste laget, og har fleire gode mogelegheiter. Kim Idar Krogsethagen testa skotfoten eit par gongar, medan Steffen Grytten heada ein corner frå Bee i tverrliggjar. På overtid i 1. omgang skulle så midtstoppar Grytten score. Nok ein gong er det ein godt slått corner frå Bee som Grytten breisider i mål til fortent 2-1 leiing.
ÅVK sette sjeldan Norborg-keeper Gamlem på prøve og kunne vere glade for at det berre stod 1-2 til pausen.
Tre minutt ut i 2. omgang får Ole Theodor Hovden sjansen frå 20 meter. Frisparket sette han hardt og kontant i nota nede ved høgre stolpe til 2-2. Gleda varer ikkje lenge for heimelaget. Tre minutt seinare scorar Kim Idar Krogsethagen etter at ÅVK ikkje får klarert eit frisparkinnlegg av Kristian Søviknes.
Punkterar kampen
Det neste kvarteret er prega av mange frispark og lite fint spel, men frå det 70. til det 85. får vi sjå mykje god fotball. Først er det Krogsethagen og Stein Erik Reitan som kombinerar fint på høgresida der Reitan spelar fint igjennom til Krogsethagen som scorar åleine med keeper. Begge lag skapar sjansar dei neste minutta, men det er Norborg som finn vegen til mål. Denne gong er det Tarjei Urkedal som header inn ein god corner frå Bee. Ti minutt før slutt fikser Steffen Grytten 6-2 leiing då han header inn eit innlegg av Kristoffer Søviknes. Minuttet etter er sistnemnte nær mål, men avslutninga går i stolpen.
Linjedommar er trenar i Van.kam.
I løpet av dei fem siste minutta får ÅVK pynte to gongar på resultatet. Fem minutt før slutt er ÅVK farleg frampå, men skyt i stolpen via ein Norborg-forsvarar. I sekunda etter stolpeskotet blir det mykje surr. Dommaren ser først ut til å dømme offside, men etter samtale med linjedommaren frå Fiskå, og trenar for Van.kam. sitt smågutelag, blir det på uforklareleg vis dømt straffe. Vi stille her sterk tvil i Sunnmøre Fotballkrins sine vurderingsevner, som sette opp ein linjedommar som er medlem i eitt av laga som speler. Samtidig som det blir dømt straffe blir keeper Gamlem utvist då han får sitt 2. gule kort grunna munnbruk. Straffa sette Martin Eikremsæther i nota bak Steffen Grytten. På overtid sette Håvar Karlsen inn 4-6 frå kloss hald.
Avslutninga på kampen sette ein liten dempar på Norborg sin flotte dag. Oransjetrøyene ville mest, var best og pressa på for sitt 7. mål då ein får straffe i mot og utvisning. Likevel, ein strålande kamp av Norborg der mange av spelarane heva seg frå sist gong. Midtstoppar Steffen Grytten vinn duellar og scorar to mål, Bee gjer nok ein god kamp på midtbana og slår gode hjørnespark, med seg har han også to gode indreløparar i Kim Idar Krogsethagen og Kristian Søviknes. På topp jobba samtlege godt og stressa motstandaren. Den tidlegare arbeidssame høgrekant Tarjei Urkedal trivst som midtspiss og scora nye mål. I denne kampen scora han sitt 8. og 9. for sesongen, og sine seriemål nr. 50. og 51. totalt.
Neste kamp er heime mot Godøy torsdag kl. 1830.
Neven, Kim, Snes og Bonden kosa seg med americaner på veg til Eidså.
Hadde berre konsentrasjonen til Calven og Fisken vore like god i kampsituasjon..
Pausebilete: spelarane er ganske rolege her, men det vart full krangling kring temaet “syting”, nokre augenblink seinare. Resultatet vart eit hissig lag som presterte årsbeste…
To mål på keeper Ladden
