Norborg – Sunnylven 2-2 (2-1)
Uggedal stadion, 05.06.08
9 sjansar 7
10 cornere 2
1-0 Geir Ove Grønli (2)
1-1 Bård Forbord (str. 18)
2-1 Kristoffer Søviknes (32)
2-2 Alf Ole Sundgot (47)
Tilskodarar: 85
Dommar: Jan Erik Bratteberg (Ørsta)
Ass. dommarar: Rolf André Sandvik (Spjelkavik) og Jon Olav Skodjereite (Skodje)
Laget: Geir Roar Gamlem – Stein Erik Alvestad, Kjell-Terje Brusdal, Morten Kalvø, Kristian Furnes (Jan Even Drønnesund, 85) – Kristian Søviknes (Ole Johan Urke, 62), Geir Ove Grønli (Bee, 80), Steffen Grytten, Stein Erik Reitan (Elling Mikal Kalvø, 85) – Tarjei Urkedal, Kristoffer Søviknes (Skjalg Volstad, 60).
Norborg makta ikkje å få det avgjerande målet mot Sunnylven torsdag kveld. Gjestane sin polske keeper stod som ein vegg då Norborg pressa på i sluttminutta. Dermed vart det 2-2 for tredje gong på rad for oransjetrøyene.
– Sunnylven er ein motstandar der vi må yte litt ekstra for å vinne, sa trenar Ivar Roald. Og Sunnylven viste seg som eit lag med fleire gode spelarar, spesielt ein polakk heilt bakerst.
Pangstart
Norborg starta kampen klart best og scora på sin første sjanse på eit knallskot frå 25 meter av Geir Ove Grønli. Like etter skyt Kristian Søviknes i stolpen og vertane er også nær mål etter corner av same mann. Sunnylven er både gode og heldige som ikkje låg under med meir enn 1-0 då assistentdommar bestemme seg for å hjelpe Sunnylven. Kjell-Terje Brusdal og Alf Ole Sundgot er i løpsduell då sistnemnde faller innafor straffefeltet. Få på Uggedal stadion skjønnar noko då det blir peika på straffemerket etter at assistentdommar vinka. Rutinerte Bård Forbord gjer ingen feil frå kritmerket og utliknar.
Leiing til pause
Etter utlikninga er Sunnylven nærmast leiing ved to høve, men det er Norborg som kan gå til pausen med 2-1 då Tarjei Urkedal legg inn til Steffen Grytten som frå bakarste stolpe headar inn framfor mål til Kristoffer Søviknes. Han gjer ingen feil å sette ballen i mål.
Alzheimer?
I pausen fokuserer trenar Roald på å hindre raske Sundgot bakrom. To minutt ut i 2. omgang var desse orda gløymt og nemnde Sundgot scorar åleine med keeper. Norborg er nær ved å svare to minutt etter då Stein Erik Reitan tek med seg ballen framover å skyt ifrå 16 meter, men Sunnylven sin gode keeper Daniel Jerzy Berbeski reddar glimrande.
Polakk hindra siger
Kampen er i store periodar lite underhaldande med ein dommar som brukar basketballreglar. Nærkontakt vart ikkje tillete og spesielt Alf Ole Sundgot var flink til å utnytte dette. Siste tjue minutta vakna kampen til liv, og begge lag har store sjansar til å score. Norborg gjer nokre heldige bytter mot slutten og tek fullstendig over siste ti minutta. Elling Mikal Kalvø kom seg til eit par gode sjansar, men keeper Berbeski redda skota hans med tigersprang. Sjeldan har vi sett ein so god keeper i 4. divisjon. Dermed enda kampen med 2-2.
Norborg var lite nøgd med dommaren og følte seg bortdømd. Straffesparket var særs billeg, men ein kan ikkje berre skylde på dommaren for at tre poeng gjekk fløyten. Etter den gode opninga slutta Norborg å spele god fotball og det vart mykje langt og upresist. Sunnylven har ei god sentrallinje, vann duellane og var alltid ein trussel med Sundgot på topp. Poenget kan dei likevel takke keeper Daniel Jerzy Berbeski for. Han tok skot som normalt går i mål på dette nivået. Norborg sin bestemann var Steffen Grytten. Han jobba frå start til slutt både offensivt og defensivt. Elles godt innhopp av Elling Mikal Kalvø som sette fart på Norborg med godt angrepsspel.
Norborg si neste oppgåve er borte mot Ørsta komande torsdag.
På notisblokka:
1 min: Geir Ove Grønli klinka ballen i krysset frå 25 meter. Pangstart for Norborg.
3 min: Kristian Søviknes skyt i stolpen frå 10 meter.
15 min: Farlig corner av Kristian Søviknes. Stuss frå Grønli. Pingpong før Sunnylven klarerer.
18 min: Billeg straffe til Sundgot og Sunnylven. Forbord sette inn 1-1.
22 min: Sundgot igjennom, men skyt utafor.
29 min: Sunnylven-sjanse, men sleiver i avslutninga.
32 min: 2-1. Kriss scorer etter innlegg frå Tarjei til Steffen på bakarste. Han headar inn til Kriss.
47 min: 2-2. Sundgot igjennom lirkar ballen i mål.
49 min: Reitan tek med seg ball inn mot 16 meter og skyt, men keeper reddar godt.
70 min: Sunnylven med farleg dødball. Utafor på bakarste.
73 min: Tarjei spelt fri av Ole Johan Urke, men greier ikkje å overliste keeper.
83 min: Stor Sunnylvssjanse. Skot frå 20 meter, retur, men Geir Roar reddar til corner.
84 min: Norborg-kontring. Reitan skjer inn mot 16 meter, Bee kjem å avsluttar utanfor.
85 min: Sunnylven avsluttar like utanfor.
87 min: Elling Mikal Kalvø med skot frå 12 meter. Keeper raskt nede å reddar.
89 min: Elling med nok eit godt forsøk, men keeper med fantastisk redning.
90+3 min: Urke med forsøk. Keeper får slått til corner.
